Manhid

Wala ni sinuman ang makahahadlang

Sa pag-ibig sa’yo aking minamahal

Alam kong mali ang aking nadarama

Ngunit tuloy pa rin ang sayo’y paghanga.

Di ko man alam kung paano pigilin

Damdamin ko sayo’y sana’y bagyuhin

Masaklap man ito, kailangang tanggapin

Upang sa iyo’y ako’y mapalapit.

Tuwa ko’y labis kung ika’y makausap

Mas lalo na kung ikaw ay makasama

Nababalisa naman kapag nakikita

Sana’y nadarama ko ay mawala na.

Nagseselos ako ‘pag kasama mo siya

Ngunit kaibigan ko siya, anong magagawa

Ang tanging masasabi’y magpakatanga

O pigilin ang damdamin bago lumala.

Anong gulo na naman aking pinasok

Sadya nga bang kabataa’y mapusok

Kailangang malampasan ang pagsubok

Na inihatid ni kupidong pahamak.

Hay, kaysaklap ng aking kwentong pag-ibig

Sana’y ang lahat ay isang panaginip

Upang hindi na madarama ang sakit

At ako na lamang ay magpapakamanhid.